काठमाडौं । संसद विघटनको विरोधमा नेपाली काँग्रेसले देशभर प्रदर्शन गरेको छ ।
संसद विघटनलाई असंवैधानिक भनेको काँग्रेसले देशभरका ३३० वटा निर्वाचन क्षेत्रमा विरोध कार्यक्रम गरेको हो । विरोध प्रदर्शनपछि आयोजित सभालाई सम्बोधन गर्दै नेताहरुले संसद विघटन असंवैधानिक भएको बताएका छन् ।
काठमाडौं क्षेत्र नम्बर ५ को बूढानीलकण्ठमा आयोजित सभामा सभापति शेरबहादुर देउवा आफैं सहभागी भएर संसद विघटन संविधान विरोधी कदम भएको बताउनुभयो । तर यो मुद्दा अदालतमा विचाराधिन रहेकाले जुलुस निकालेर यो गर, उ गर भन्न नहुने पनि उहाँले बताउनुभयो ।
सभापति देउवाले मोटो आँखाले हेर्दा ओलीको कदम प्रजातन्त्र विरुद्धको र संविधान विरुद्धको कदम भएको धारणा राख्नुभयो । तर अदालतमा मुद्दा विचाराधीन भएकाले जुलुस निकालेर यो गर, उ गर भन्न नहुने र अदालतको निर्णय पर्खिनुपर्ने उहाँको भनाइ थियो ।
अदालतले मध्यावधिमा जाने ओलीको कदमलाई सदर गरे काँग्रेस चुनावमा जाने भन्दै उहाँले सर्वोच्च भन्दा ठूलो अदालत जनता हो, जनतामा जाँदा के बिग्रन्छ ? भनेर प्रश्न गर्नुभएको थियो । तर अदालतले संसद विघटनलाई सदर गरेपनि प्रधानमन्त्री केपी ओलीले चुनाव गराउँनेमा धेरैलाई शंका रहेको पनि उहाँले बताउनुभयो । ओलीले चुनाव नगराए सबै मिलेर सडकबाटै फाल्ने सभापति देउवाले बताउनुभयो ।
