एजेन्सी । बेलायत औपचारिक रूपमै युरोपेली संघ इयुबाट बाहिरिएको छ ।
सन् १९७३ मा संघको सदस्यता लिएको बेलायतले ४७ वर्षपछि स्थानीय समय अनुसार गएराति ११ बजेदेखि इयुका नियम पालना गर्न छाडेको हो । युरोपेली युनियनमा बस्न नहुने माग विपक्षीबाट आएपछि सन् २०१६ मा बेलायतमा यसबारे जनमत संग्रह भएको थियो ।
ब्रेक्जिट अर्थात बेलायत युरोपेली संघबाट बाहिरिनुपर्छ भन्ने पक्षमा ५२ प्रतिशत र छाड्नु हुँदैन भन्ने पक्षमा ४८ प्रतिशत मत खसेको थियो । त्यसपछि ब्रेक्जिटका लागि दुवै संसदले विधेयक बनाएको थियो र महारानी एलिजावेथ द्वितीयाले स्वीकृति दिएका थिए ।
यो प्रकृया आज औपचारिक रूपमै सम्पन्न भएको बीबीसीले लेखेको छ । प्रधानमन्त्री बोरिस जोन्सनले अब बेलायतको स्वतन्त्रता आफूहरूकै हातमा रहेको र फरक तथा राम्रो तरिकाले काम गर्ने बताए ।
